一個人放工，誰知所有小巴、巴士車尾都送了。
一氣之下是但上一部，結果去咗彩虹邨食飯。有個細路拎住碗白飯大嗌「太多食唔晒，唔該減走啲丫」，個事頭婆同個暑期工講人生嘅道理「女人嚟講好簡單，係要安全感啦」，執檯阿姐同同事講「我一定無140磅我話你聽」，我就做其默觀者。呢個時候老闆阿叔拎住杯茶過嚟。「嚟，飲杯茶先講啦。」
呢一種輕鬆的「18樓C座」，真係好耐無遇上過。
記起返工時，講起最低工資解決唔到租金暴漲、逼死小戶嘅問題。今晚我坐晌呢間唔係領匯管嘅小店入面，睇住執檯阿姐同同事頭婆分一個麵包嚟食，我再望望玻璃窗上25蚊嘅午餐，突然間百感交集。
呢個時候暑期工哥哥叫出嚟：「吓，聽日午餐食魚香雞絲飯? 點解九唔搭八咁嘅。」「轉吓花款咁啫。」執檯阿姐應佢。
真係好耐未聽過咁直腸直肚嘅對話。
真係好耐未聽過咁直腸直肚嘅對話。
走嘅時候，老闆阿叔開門送我出去。「多謝晒呀。」
「唔該晒你。」我真係講得好真心。
「唔該晒你。」我真係講得好真心。
九點幾嘅彩虹邨，除咗一間茶餐廳同一間漫畫店，基本上已經閂晒門。走在冷冷清嘅走廊，側邊係上海理髮店同辦館。條內街已經無乜人氣，但漫步其中卻又唔覺得孤寂。因為路邊就係住宅單位，隱隱約約，你會見到少少入面嘅陳設。
其實彩虹邨嘅單位的確係細而且舊，呢件事係唔能夠刻意美化。但每經過一間屋，你都見到少少舊擺設同用具。呢條邨就係咁盛載咗好多家庭嘅家族史，一代又一代人晌呢度成長。
萬家燈火圍住內街，走在其中，你真係好覺得，呢個係一個好有人味嘅小社區。要努力保留住呀。
No comments:
Post a Comment