詐騙前的臨界點

我對香港的 phone marketing 的憎惡，幾乎去到一個無以復加的地步。

面對那些不要臉地一股傻勁 cool call 的嘍囉，有人會好聲好氣回答幾句，有人會跟他們開玩笑，我這兩件都不想做，一句「不需要」就收線。 問題不是我覺得浪費時間，而是我覺得啲人講嘢好奸。一認真聽你就輸了。

但有時，有些服務跟你切身有關係，或者你正在使用，不接又怕遺漏了重要的問題（其實機會很小，因為不是坑你錢的話他們是不會找你或者被你找到。）於是我就要很小心接他們的電話。

這天我接了一戰，氣上心頭，一定要記下來。

同一個sales，2 天找了我 3 次，說是有關於我現時正在用的上網服務，想阻我少少時間。這樣鍥而不捨，可能真的有要事要說。我擺好陣勢拿定紙筆，坐在電腦面前接戰。

S:「其實係咁架，睇番彭生而家係用緊我地既8M上網服務，每個月包埋兩條收費電視頻道，係 XXX 蚊架。我地而家可以同彭生你登記番，可以即刻升上去100M架。」
P:「吓，乜我唔係用緊30M咩?（我即刻上網搵番張月結單對對價錢）同埋我而家係 XXX+18蚊喎。」
（你唔係而家黎同我講收左我咁耐錢無轉過速度呀，我即刻上speed test，結果係26M。）
S:「哦，原來我地同事都同你裝過30M啦，係嘞，咁不如我而家同彭生你登記番，6月13日師傅就可以上黎同你即刻升上去100M架喇。」
P:「... ... 咪住，你話升上100M，咁個條件係咩呢?」
（係條件從來都係唔問唔講，逼你登記咗先。）
S:「其實咁既，都會同彭生做番個 2 年既合約啦，咁月費就係 XXX + 40 蚊咁樣既（「嘩。」），但係我地會送番500蚊既惠康現金優惠俾彭生你架，如果你咁樣計呢，除番開每個月其實就係 XXX 加幾蚊架咋，咁就可以以享受快幾倍（30M X 3 倍）既上網速度架啦，或者而家都同你做番個登記就得架啦。」
（數字遊戲，數字上係計得掂，但佢係搵現金券同你換錢，而佢買現金券就一定平過你，佢就可以賺中間差價。而且，拆散晒你要俾既錢，唔理你既理財習慣同需要，係一種幾乎係扭橫折曲既取巧。如果佢認為咁樣係合情合理，咁我可唔可以每個月將我一個食剩左一半既36蚊西瓜交去佢個門市黎交個18蚊既30M附加費呢? 仲有，個個所謂既上網速度，完全係抽象到爆，我load一個page可能無咩observable change，由0.5秒到0.25秒係快左一倍，之但係我完全唔會有感覺。可能唯一有D用係用黎玩BT啦。）
P:「咁樣，我要同屋企人商量一下先，或者你俾個電話我，我有需要覆你。」
S:「好呀，我既直線係 &^%@#$ ，我姓鄭既，或者我聽晚打俾你丫，唔知方唔方便?（「嗯...」）咁其實都仲有樣野會同彭生補充番先，而家你用緊個兩個收費既電視頻道呢，都會按番我地有個優惠價38蚊繼續欣賞番既...」
P:「喂咪住，我而家係包埋晌個plan入面唔駛另外收費架喎。咁而家係XXX+40蚊包埋定係另外收多38蚊呢?」
S:「咁都係會按番我地一個優惠價38蚊做番俾彭生啦。」
P:「咁即係XXX+40蚊另外再收啦係咪?」（即係 XXX + 78蚊喎PK!）
S:「... 係呀 ... 呀或者彭生你等我一陣間，我可以同經理傾番會唔會有番個再優惠D既價錢做番俾彭生你丫。」（SILENT 幾秒）「係彭生，其實我地都可以做多一個優惠俾你既，就係可以免你兩個頻道 4 個月既費用同埋再俾多50蚊既超市現金券喎。咁計落係再平D.... 咁&^%@#$ 計既話.... 彭生你每個月只係俾XXX-20蚊咋，仲平過而家呀。」（咁都計到平過我而家? 你係邊位數學家呀。）
P:「得啦，我諗諗佢。但我真係好唔滿意囉，你地好奸姐，將D額外收費放晌最後先講，如果我應承你，就係登記之後先一次過爆晒出黎，個D數咁多hidden charge，唔係咁做生意呀。」
S:「其實咁架喎彭生，我地係會將所有費用同埋條款晌登記資料之後裡面同彭生你講番架，無隱藏任何收費既...... （後刪幾百字解釋）」
 

不用談「中環價值」那麼隱晦；我眼中的主流香港商業價值，就是走在詐騙前的臨界點，可以做到幾賤而不用坐監。你唔出聲就當你唔係人，一係就當你係傻仔，出晒賤招然後就用個堂而皇之的說法包裝一下，金玉其外敗絮其中。

所以商業掛帥，鉅商治港的香港，做野同一個logic，呢個就係一個低智能的黑心法治社會。